img11.jpg

TAKERKAST D TIDET

Tizwuri n tudert, llant snat n tsednan: Yiwet isem-nnes Takerkast tayeḍ Tidet, gant timeddukkal ittemyawasen ittemmesxitiren ar yat n tikkelt.

Teγra-yas Tkerkast i Tidet tenna-yas: Nekraγ a neddu ad d-nekk isemḍel n tgwerramt-nnteγ, iwa smutter ayenna yam-isagan i ubrid aγwezzaf!

Iddeγ ilkem wass nna γef msasant munent babbent tissufriwin tibaẓayin-nnsent γef tdiwwa kkent tiṭ n umerdul. Ar tteddunt s uzal sgunfunt s yiḍ. Akud nna g ggawrent ad čent kra da tettetta Tidet ard teǧawen, Takerkast, da teggar g imi-nnes kra idrusen tsew snat neγ kraṭn txubba n waman.

Asag as-tenna Tidet maγ ur da tettetta γas ayennaγ trar-as nwis ur telluẓ neγ teffud. Imkinnaγ ayed yaγen (ijran) allig nn-gulant tagwerramt-nnsent. Ayenna d-aγulent γer tmazirt-nnsent, seg wass amezwaru, γas da ttγimant ad sgunfunt neγ ad čent kra tessufeγ-d Tkerkast ayelli teffer: Han tamamt, han udi, han aksum, han aγrum; taγ-nn ar tettetta s may mi tezmer. Tidet, nettat tufa-nn uči-nnes idrus, mek teča kra ur as-ikkis laẓ, is teswa kra ur as-ikkis fad. Akud-nnaγ ayed tukez maγ ur da tettetta tesmunt-nnes kigan.

Rnant kra n wussan n twada, ismur-as wuči smuren-as waman i Tidet. Tessuter-as i Tkerkast kra tettetta, tezmumeg-as, day tenna-yas: Unna ičan ili-nnes yader i tiṭ-nnes! Maγ is am-nniγ ssmur ayenna d-tuwid? Taγul teẓẓel-as taberruyt n uγrum mi tegra kra n wudi. Izrey wass-nnaγ, ilkem imensi, ar tetteqqel Tidet ad as-tefk diγ kra tenna mi tγal is tga tameddakkwelt-nnes, maca temmensew Tkerkast zund ur illi γas nettat g udγar. Ayenna teẓra Tidet tigi n tesmunt-nnes ar tettru, ar tt-tettzawag is ur as-tessenγa tasa.

Tesnaγes Tkerkast umum yaγen tasmunt-nnes tenna-yas s wawal idusen: Mek trid a kem-sečaγ iqqen-kem-inn ad i-tefrud! Is kem-issusem ad tettettad ayenna n wiyeḍ s umdaz?

Trura-yas Tidet tenna-yas: Ur γuri daddeγ mas am-ferruγ, zziḍer ard nn-ngulu tamazirt!

Tessen Tkerkast is as-tella Tidet ddaw n ufus, tagey ad as-tezzrey uči neγ tessi tenna-yas: Trid ad tečed da tsud da, iwa fru da!

Tsesten-tt (tseqsa-tt) Tidet γef watig n wuči, tenna-yas Tkerkast: Ad am-sebḍiγ tiṭ fkeγ-am tessi d wuči!

Temmuγey Tidet yiwen ummuγey ameqwran, maca tẓayet atig nna tetter Tkerkast acku teswangem kigan taf-nn is tuf Tidet tar tiṭ Tidet tar tudert. Teqqim allig as-tsebḍey Tkerkast yiwet n tiṭ, tameẓ uči d tessi maca ur tukiy d uyennaγ sucku ar as-ittiqiq waggas.

Ddant g ubrid-nnsent wayeḍ wass, ar tettsuf Tkerkast s trennawt. Tedwel Tidet ur tezḍar ad teddu, teqqim s laẓ ass akw ur as-tettir kra i Tkerkast. Wiss sin wussan tseksew g iγef-nnes tedda γer tmettant, teẓẓel-as tiṭ-nnes tiss snat i Tkerkast, tsebḍey-as-tt tefk-as diγ kra tettetta d kra tessa.

Temdez Tkerkast iddeγ teẓra Tidet tedderγel, tezri-tt-nn g tneẓruft ar tettenfala, ar tettaggum mayed as-isskanen abrid γer tmazirt-nnes.

Σumar DERWIC

هذه المقالة تحتوي على لا تعليق

أكتب تعليقك هنا

نرجو أن تضع المادة أسفله
الإسم
إيميل
موقع
تعليقك

    ⵉⵎⵓⴷⴰⵔ – ⴰⵙⵍⵎⴷ ⵙ ⵜⵡⵍⵍⴰⴼⵉⵏ


ⵉⴷⵔ ⴰⴼ ⵜⴰⵡⵍⵍⴰⴼⵜ ⴼⴰⴷ ⴰⴷ ⵙⵓⴳⴳⵣⴻⴷ ⴰⴷⵍⵉ ⴰⴷ ⵏⵖ  ⵉⴷⵔ ⴷⴰ

  • ما رأيك في موقع تاوالت الجديد ؟






    بين النتيجة

    Loading ... Loading ...
  • tamatart

    tamatart



    taddart

    ٍradio awal